حنة عواطف – من إبداعات الكاتب الساخر الأخ الفاتح جبرا

by

من روائع وإبداعات الكاتب الساخر الأخ العزيز / الفاتح يوسف جبرا ..أنقلها إليكم بإذنه وموافقته… آملين أن تجدوا فيها ما يدخل البهجة والسرور على نفوسكم ..
الناقل : حاج أحمد السلاوى
حنة عواطف !
كان ذلك فى منتصف ثمانينات القرن الماضى وكنا وقتها نأخذ (نصيبنا) من الإغتراب بإحدى دول (البترول) ، فى نفس العمارة التى كنا نقطنها كان يسكن صديقنا (سعيد) فى الطابق الأعلى للشقة التى أسكن فيها حينها
وسعيد هذا ينتمى إلى أحدى القبايل التى تتكسر فى (الزوجة) كسير شديد وتجعل طلباتها مستجابه فى (لمح البصر) بل تجعل الزوج كما (الربوت) يسير وهو مبرمج تماماً … يمين يمين .. شمال شمال .. كان (سعيد) ينصاع إنصياعا تاما لزوجته (عواطف) والتى أسميناها (الحكومة) فما أن يسمع سعيد صوت (الحكومة) وهى تنده له إلا و(يرمى) ورق (الويست) الذى كنا ندمن لعبه فى العطلات ذاهباً نحو مصدر صوتها ملبياً لأوامرها تماماً .
كان سعيد يهيم حباً بزوجته (عواطف) حتى تخال أنها عشيقته فأنت إذا ما قدر الله وذهبت معه للتبضع فى السوق فاجأك قائلاً :
– والله التوب (المشجر) داك أريتو فى (عواطف) !
– شفت (أحفظ مالك ) الفى البترينه داك يجنن أنا ح أشتريهو لى عواطف !
فى أحد الأيام وبينما أنا أصعد درجات السلم نحو (شقتى) مرورا بشقة سعيد وجدته أمام باب شقته عائداً من (الشغل) وهو يحمل فى يده (بطيخة) وعددا من) الأكياس) وبعض الصحف والأوراق ونفسو (طالع ونازل) من الشيل .
– مالك يا سعيد واقف متحير ؟
– وهو يشير بنفس مقطوع نحو شقته) : الشقة مقفولة والمفتاح جوه مع عواطف
– طيب ما تكورك ليها !
– لا .. لا .. ما أصلو هى قاعده محننة
– ويعنى شنو؟ ما تخليها تطلع الحنة و تجى تفتح ليك
– كيفن تجى تفتح ليا أكان جات فتحت ليا حنتا ما بتبوظ ! قالت ليا إنتظر الحنة لامن تشيل و(أخرِتا) حتين أجى أفتح ليك !
– وأنت هسه قاعد راجى حنة عواطف لامن تشيل ليك بعد ساعتين ؟
– ساعتين شنو؟ فى أقل من ساعة ح تشيل .. دى أصلو (حنة التاج) جايبا ليها أنا (من السودان) مع الشاف والطلح والمحلبية (نمرة واحد) أصلية (ميسو) … أنا حاجات (عواطف) دى ما بلعب فيه كلو كلو!
– طيب خلاص وكت ما عايزا (تفرتق) حنتا تعال أطلع معاى فوق فى الشقه لحدت ما حنتا تشيل وتطلعا وتفتح ليك الباب !
وطلع معى (سعيد) إلى شقتى وهو يحمل) البطيخة) وكل تلك الأكياس والأوراق والصحف وما أن جلسنا ورأى علامات الإندهاش على وجهى حتى بادرنى قائلاً :
– كل حاجه ولا بشتنت عواطف دى .. أنا عاوزا لمن تمشى عرس ناس سعاد بت بابكر بعد بكرة النسوان ديل لمن يتضايرن
– هى لاكن .. أنت كده الوقفه البره دى عليك ما حارة ؟
– لا حارة ولا حاجة أنا كل شئ ولا زعل عواطف دى .. لازم حنتا دى تطلع سمحه وذى سواد الليل !
رفض (سعيد) رفضا قاطعا مبدأ ان يتناول معى طعام (الغداء) قائلا لى :
– عواطف دى لو أنا ما أكلت معاها ما بتاكل !
إنقضت حوالى ساعة من الزمان كان يحدثنى فيها )(سعيد) عن علاقته الحميمة مع زوجته (عواطف) وكيف أنه حريص على تجنب (زعلها) ودائم العمل على إرضائها كما عرج على موضوع (حنة عواطف) وكيفية إختيارها (للنقشات) وعدد (الحنانات) اللواتى كن يقمن بعملية رسم الحنة لها فى السودان وإختياره للنوع الجيد من (الطلح) والشاف من شاطئ (أبوروف) وأخذه معه (صحبة راكب) فى الطائرة وبعد أن إستمعت له قلت له مندهشاً :
– ياخ معقول فى راجل بيهتم بالحاجات دى كده !
– كيفن ما أهتم ؟ دى (عطوفه) ياخ !
– طيب قوم شوف (عطوفه) بتاعتك دى (حنتا شالت) !؟ عشان تدخل المأوراق والملفات الشايلا ليك ساعتين دى !
خرجت مع (سعيد) وهو يحمل الذى إتكأ مرة أخرى على الأنبوبه وقال مخاطبا (عواطف) فى رقه زأئدة :
– عواطف .. عواطف .. حنتك ما شالت؟
– جاءه الرد سريعا فى حده) : ياخى كرهتنا الحنة ذاتا .. ما قلنا ليك لسه ما شالت !
أحمر وجه سعيد وإصفر ثم إحمر مرة أخرى ونظر لى مبتسماً وهو يقول :
– عواطف دى مرات كده عندها عصبية زياده شوية !

14 تعليق to “حنة عواطف – من إبداعات الكاتب الساخر الأخ الفاتح جبرا”

  1. حاج أحمد السلاوى Says:

    غايتو سعيد دة يا إما إنو راجل شين جداً وعواطف دى قبلت بيهو على مضض وهو ما مصدق إنها قبلت بيهو.. عشان كدة هو راقد قفا وبقى زول مطيع جداً يلبى كل طلباتها .. أ
    أو إنو راجل عجوز وعواطف دى بت صغيرة وعاوز يرضيها بأى طريقة .. يعنى هو كان غالبو إنو يعمل نسخة تانية من مفتاح الشقة عشان لو هى بقت بتتحنن أو نايمة ( نوم العوافى ) يقدر يدخل الشقة وقت ما يرجع ..
    أنا غابتو جنس دة ما لاقانى أصلو … إنتو حصل لاقاكم زول زى دة ؟

  2. حاج أحمد السلاوى Says:

    alaa abdeen al_tahir يقول:

    22 فبراير 2009 عند 4:33 م
    والله عواطف يا خالو إتلوووووووووووووووووووووووووووووووومت,بعدين هو زاتو شكله ما جعلي زي ما بقول بابا ولا شنو؟؟؟؟!!!!

  3. alaa abdeen al_tahir Says:

    والله عواطف يا خالو إتلوووووووووووووووووووووووووووووووومت,بعدين هو زاتو شكله ما جعلي زي ما بقول بابا ولا شنو؟؟؟؟!!!!

  4. أسامه ود محاسن علي شرفى Says:

    بسم الله الرحمن الرحيم

    الحاج ود زهرا … ( كده خلاص عرفت أمى أسمها منو ؟ ) ولا عاوز صورة الجواز كمان ؟؟؟؟ …

    يا ابو الحجاج …صاحبك العزيز الفاتح جبرا و (مثلثات ) ده جننا بقصص الخيال العلمى العجيبه بتاعته دى .. ( لكم التحايا جميعا ) أما صاحبك التانى السيد (سعيد ) فأعتقد أنو سعيد بما هو عليه .. وحالته (تحنن ) لأنو شكله كده جمع الصفتين اللى قلتهم أنت مع بعض يعنى راجل عجوز وشين كمان لذلك ما قادر يسيطر على (عواطفه ) بالرغم من أنو عبر عنها بطريق جيده جدا .. وكمان عواطفه برضه سعيده به لانو ما ممكن تلقى أحسن من كده …

    موضوع المفتاح بتاع الشقه ده فما أظن حايعمل منو نسخه لأنو يبدو انو (المفاتيح) كلها فى يد (عطوفه ) ونايمه عليها قفا ..

    غايتو يا أبو الشباب … ذى ما قال الفنان محمد ميرغنى .. ده شيتا أصلو ما شفنا لا فى الناس ولا في الريف …

    وخلينا نحن بره الموضوع … لانو هم الاتنين راضين .. و المثل بيقول :- صاحب الحق راضى شن دخل القاضى ؟؟؟ ….

    سلام ….

  5. Manool Armeeka Says:

    Osam Wad Khalid: I really like your comment about Awatif and Saeed. I wish if all women in the world had the power; I mean the ( key) to the all doors

  6. احمد كمال Says:

    لكن سعيد مسكين واللة هدى ورضى وعواطف زاتة صعبة كان حبيبك عسل ماتلحسلو كلو عواطف صعبة جدا وماعندها اى زوق

  7. برامج الاتصال المجاني عبر الإنترنت Says:

    برامج الاتصال المجاني عبر الإنترنت…

    كتاكـــــــيت تستخدم برنامج الوورد بريس مع قالب Greed 0….

  8. نجد Says:

    نجد…

    این نوشته در تاریخ شنبه, اسفند ۱۰م, ۱۳۸۷ و در زمان ۹: ۲۱ ب. ظ با موضوع از درون اجتماع ارسال شده است. شما می توانید با استفاده از فید RSS 2. 0 نظرات این نوشته نظرات دیگران را دنبال کنید. همچنین شما می توانید نظری بنویسید، و یا بازتابی از سایت خود ارسال …

  9. سيف الدين محمد خير السيد السلاوي Says:

    أبو الحجاج … أبو وعد ووضاح

    التحيات العطرات

    ده منو كمان الإسمو ((نجد)) شكلو كده من الكتابة الكاتبها يا باكستاني أو ايراني والله أعلم …. ما علينا ….. حاجيب واحد يفسر لي الكلام المكتوب ديه ….. أما بخصوص سعيد عواطف فتعليق أخونا أسامة خالد في منتهى الروعة على هيك حكاية ….والدنيا مليانة زي سعيد وزي عواطف … بس عواطف زايداها مية حبة … وما عندها زوق على الإطلاق …. الراجل حابيها حب شديد ورضيان باللي هو فيهو ….. وكاتب ميت فيها …… تجي تكسر خاطرو في النهاية وتقول ليهو ياخي كرهتنا الحنة ذاتها … قلنا ليك ما شالت لسع .. ديه اسمو كلام يا عوض دكام …..ولا نسيبها للأيام ….. وعندي همسة في أذن عواطف …. الراجل ديه (سعيد) شاريك وإنتي بايعاهو برخص التراب …. حرام عليك كده …… احترمي الراجل عشان يحترمك ويقدرك أكثر وأكثر ويسلم أمرو لله … كثرة الضرب على الراس بيفرقع ..وبعدين لو فرقع حتروحي في شربة مويه …. أحسن ليك تروقي كده وتقبلي بقسمتك اللي قسمها ليك رب العالمين …. لأنو اللي ما بترضى بقسمتها ربنا سوف يعطيها واحد أخس من سعيد … يديك الصبح علقة والمساء علقة وحتكوني راضية لأنو إنتو كده يا النسوان ….الواحد اللي يحبكم …. تكرهوهو وتخلو ليهو الدنيا جحيم لا يطاق ….. أما المرأة إذا أحبت رجلاً رضيت منه كل شيء حتى لو ضربها أو زعق فيها أو لخبط ليها العجين فبرضو بتحبو لأنو عندو شخصية وبقول لا بالفم المليان … والواحدة فيكم تحب الراجل الشخصيتو قوية .. ويشخط ….. ويأمر … ويتأمر ….ولكن سبحان الله ما توريهو إنها بتحبو أو بتموت فيهو موت ….. أما المرأة فمهما كانت من قوة فهي لا تحب الراجل الشخصيتو ضعيفة …. وتشوف العمى ما تشوفو …. هوا عشان كدة الرسول عليه أفضل الصلاة والسلام قال إنو المرأة خلقت من ضلع أعوج … لأن الأمور كلها عندها معوجة وغير عديلة عشان كدة قال …. استمتع بها على عوجها لأنك إذا أردت أن تقومها (أي تعدلها ) كسرتها …. وكسرها طلاقها. وعجبي

    بس … ودي كل الحكاية ..

  10. سيف الدين محمد خير السيد السلاوي Says:

    على فكرة … يا حاج أحمد …. صاحبك الفاتح يوسف جبرا كاتب ممتاز ليه ما يجرب يكتب قصص أو روايات أو مسرحيات فيمكن أن تصدق معاهو … وتتفتح له آفاق جديدة ومليئة بكل خير. حاول كلموا في الموضوع ديه وشجعوا

  11. حاج أحمد السلاوي Says:

    أخونا أبو السيوف والرماح ..سلام
    شكراً على مروركم بالبوست بتاع حنة عواطف للأخ الفاتح جبرا..الرجل الساخر وصاحب الخيال الواسع الراقى..حقو تدخل معانا فى منتدى ساخر سبيل الخاص بالأخ الفاتح جبرا عشان تستمتع بما يكتبه هذا الرجل من مقالات ومواضيع .

  12. عفاف عوض السلاوي Says:

    انا اول مره اقرا حنة عواطف دي لكن بالجد ضحكتني معقول الزمن ده في راجل كده مبالغه لكن يا عمو الحاج انا عرفت سر اسم عواطف وسعيد يا دوب قلبي ده ارتاح

  13. حاج أحمد السلاوى Says:

    نحنا من زماااااااااااااااااااان بنبح ونقول فى شنو ..؟ ما بنقول أدخلو المنتدى بتاعكم دا عشان تلاقوا حاجات زى دى ..غايتو لاكين جنس لكاعة … دا شنو دا ؟؟
    بس الحمدو لله عرفتى سر إسم عواطف وسعيد ..
    بالمناسبة سلميلى على سعيد بتاعك … بكرى الراجل الطيب ..
    وكلو عام وأنتوم بخير ..

  14. جعفر صالح Says:

    يا سلام .. حقيقة استمتعت بالقصة الرائعة للكتب المبدع الفاتح جبرا .. وناس سعيد ديل كثار ماشوية.. وزي ما قال الأخوة اما شين .. او عجوز ..واما لابدلو فوق راي ..

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s


%d مدونون معجبون بهذه: